Дар МТМУ №27-и шаҳри Хуҷанд ба муносибати ёдбуди 100 солагии дорандаи ҳар се дараҷаи Ордени Шараф, Иштирокчии ҶБВ, Корманди хизматнишондодаи маданияти Тоҷикистон, Шаҳрванди фахрии шаҳри Хуҷанд Пўлод Атаев чорабинии илмию фарҳангӣ бо иштироки Раёсати собиқадорони шаҳру вилоят, пайвандон ва аҳли мањаллаву хонандагону омӯзгорон сурат гирифт.

Нахуст дар зери нимпайкараи Пӯлод Атаев чун рамзи эҳтиром ба ҷоннисориҳояш дар ҳифзи Ватан гулчанбар гузошта шуд.

Меҳмонон бо либос ва ашёҳои истифоданамудаи марҳум ошноӣ пайдо карданд, ки хеле муассир буд.

Дар оғози ҳамоиш директори муассисаи таҳсилоти миёнаи умумии №27-и шаҳри Хуҷанд Манзура Ғанизода баромад намуда, аз ҷумла афзуд, ки воқеан ҳам дорандаи ҳар се дараҷаи Ордени Шараф, иштирокчии ҶБВ, Шаҳрванди фахрии Хуҷанд Пўлод Атаев аз чеҳраҳои мондагор ва шахсияти барҷастаи кишвар буда, ҳаёт ва фаъолияти меҳнатии худро ба ҳифзу посбонии давлат, тарбияи кадрҳои шоистаи замон, бунёдкорӣ ва ободии диёр бахшидааст. Боиси ифтихор аст, ки яке аз муассисаи таълимии шаҳр ба номи мавсуф гузошта шудааст. Зиндагиномаи Пӯлод Атаев намунаи барҷастаи хизмат ба халқу Ватан ва дарси ибрати тамоми наслҳои минбаъда аст.

Таъкид шуд, ки чун ба саҳифаи китоби зиндагиномаи марҳум Пўлод Атаев менигарем, мебинем, ки яке аз шахсиятҳои маъруфи Тоҷикистон буданд, барои насли имрўз, як мактаби таҷрибаи кору ҳаёт мебошанд. Омўзиши ҳаёту фаъолияти ин абармарди ватандўст дар тарбияи эҳсоси наҷиби ватандўстӣ, садоқату хизмат ба Ватан ва худшиносии миллӣ зарур аст. Ҷоиз ба қайд аст, ки пос доштани хотираи арбобони давлатӣ, ҷамъиятиву сиёсӣ, ходимони илм, маориф, фарҳанг ва муҳофизони Ватан, ки аз сиёсати меҳварии Пешвои муаззами миллат муҳтарам Эмомалӣ Раҳмон бармеояд, ба ҳукми анъана даромадааст.

Сипас муовини Раиси Шўрои собиқадорони вилояти Суғд Шавкат Алиев, муовини Раиси Шўрои собиқадорони шаҳри Хуҷанд Зайниддин Зунунхӯҷаев, омўзгори фанни таърих ва ҳуқуқи МТМУ №27 Фарангис Баҳодурова ва дигарон баромад намуда, аз хидматҳои мавсуф дар роҳи ҳифзи Ватан ва ҷонисориҳояш ёдоварӣ намуданд.

Иттилоъ дода шуд, ки Пӯлод Атаев аз хурдӣ меҳнатдӯст буд ва айёми наврасию ҷавонӣ дар артели мӯзадӯзӣ ва матбааи шаҳр кору фаъолият дошт.

Ӯ тобистони соли 1942 ба комиссариати ҳарбӣ омада талаб кард, ки вайро ба фронти ҷанги зидди фашистон фиристанд. Маҳз далерӣ, матонат ва ҳушёриаш буд, ки ба гуруҳи разведкачиён дохил карданд. Пӯлод Атаев дар муҳорибаҳои назди шаҳрҳои Маскваю Сталинград иштирок карда, чун фарзанди дилбанди халқи тоҷик корнамоиҳои зиёди ҷангӣ нишон дод.

Матонату ҷасорати ӯ вақти зада, пас гардонидани душман, хусусан вақти убури дарёҳои Дон, Днепр, Прут ва Дунай равшан ба назар расид. Кори аввал дар деҳаи Краснийии вилояти Кировград барои тарконидани нуқтаи отшфиони душман ва аз майдони ҷанг баровардани командири маҷрӯҳ сазовори дараҷаи 3-юми Ордени Шараф (1943), барои ноқис намудани алоқаи байни қӯшунҳои душман ва асир гирифтани аскарони немис ба дараҷаи дуюми Ордуни шараф лоиқ дониста шуд.

Пӯлод Атаев соли 1944 дар ду деҳаи вилояти Одесса бо шаш нафар разведкачиён 3 пулемёти дурзани фашистиро аз кор бароварданд. Дар ин ҷанги нобаробар 310 нафар аскарони душман ба ҳалокат расид ва 10 нафар асири гуруҳ шуданд. Барои зуҳуроти ин матонат Пӯлод Атаев бо дараҷаи якуми Ордунеи Шараф комёб шуд.

Аз номи пайвандони марҳум Пӯлод Атаев-Киромиддин Атаев баромад намуда, барои арҷгузорӣ ба хидматҳои марҳум ва ёдоварӣ ааз ин марди накӯном ба Роҳбарияти Давлату Ҳукумат арзи миннатдорӣ намуд.

Барномаи пурмазмуни фарҳангӣ ва тарбиявӣ ба муносибати ёдбуди 100 солагии Пӯлод Атаев ба чорабинӣ ҳусни анҷом бахшид.

Изҳори умедворӣ карда шуд, ки фарзандону пайвандони марди шарифу накуном, дорандаи ҳар се дараҷаи Ордени Шараф, Иштирокчии ҶБВ Пўлод Атаев дар оянда низ бо кору заҳматҳои шабонарўзӣ баҳри ободии Ватан номи марҳумро боз ҳам зиндаву ҷовид хоҳанд гузошт.

Дафтари матбуоти Раиси шаҳри Хуҷанд