Санаи 4-уми сентябри соли равон дар толори Шабакаҳои барқи шаҳри Хуҷанд бахшида ба 24-умин солгарди Истиқлолияти давлатии Ҷумҳурии Тоҷикистон ва 20 –солагии таъсисёбии Шабакаҳои барқи шаҳри Хуҷанд маҷлиси тантанавӣ баргузор гардид, ки дар он раиси Кумитаи иҷроияи Ҳизби Халқии Демократии Тоҷикистон дар шаҳри Хуҷанд Наим Маликисломов ширкат варзид. Шабакаҳои барқии шаҳри Хуҷанд моҳи августи соли 1995 бо роҳи ҷудошавӣ аз Шабакаҳои барқии Ленинобод дар асоси Шабакаҳои барқии минтақавии Хуҷанд ташкил ёфтааст. Шабакаҳои барқии шаҳри Хуҷанд бо нерӯи барқи истифодабарандагон ва ҳудуди онро бо реҷаи муқарраршуда таъмин менамояд. Масоҳати хизматрасонии Шабакаҳои барқии шаҳри Хуҷанд зиёда аз 10 ҳазор га-ро ташкил медиҳад.
