Дирӯз  дар ташкилоти ибтидоии “Дилшинос” чорабинии идона бахшида ба 28-солагии таъсисёбии Қувваҳои Мусаллаҳи Ҷумҳурии Тоҷикистон бо иштироки муовини раиси Кумитаи иҷроияи ҲХДТ дар шаҳри Хуҷанд Муҳаббат Ӯрунбоева баргузор гардид.

  Чорабиниро раиси ташкилоти ибтидоӣ Собиров Собирҷон ҳусни ифтитоҳ бахшида қайд намуд, ки мо имрӯз дар симои хизматчиёни ҳарбии Қувваҳои Мусаллаҳи мамлакат фарзандони бонангу номус ва далеру шуҷои худро мебинем, ки ба савганди ҳарбӣ ва халқу Ватани худ ҳамеша содиқу вафодор ҳастанд. Тайи солҳои сипаришуда даҳҳо ҳазор ҷавонони бонангу номуси Ватан аз тарбияи ин мактаби далериву шуҷоат, яъне хизмат дар сафҳои Қувваҳои Мусаллаҳ гузашта қарзи муқаддаси фарзандӣ ва рисолати мардонагии худро адо намудаанд.

  Сипас муовини раиси кумиҷроя  шифокоронро  табрик намуда ба се нафар табибони собиқадор номаи минатдорӣ ва тӯҳфаи хотиравӣ тақдим намуда, ҳамзамон дар вазъияти тантанавӣ ба аъзоёни нави ҳизбӣ шаҳодатномаи аъзогӣ супорида шуд.