Бо мақсади натиҷагирӣ аз фаъолияти яксолаи Кумитаи иҷроияи Ҳизби Халқии Демократии Тоҷикистон дар шаҳри Хуҷанд тибқи нақшаи кумиҷроияи вилоятӣ рӯзи гузашта дар толори Маркази фарҳанги шаҳри Ҳуҷанд маҷлиси ҳисоботӣ доир гардид.
Дар ҷаласа муовини Раиси шаҳри Хуҷанд РаъноҲошимзода, намояндаи Кумиҷроияи ҲХДТ дар вилояти Суғд Набиҷон Халилзода, аъзоёни кумиҷроияи шаҳрӣ, роҳбарони кумиҷроия ва ташкилотҳои ибтидоӣ, фаъолони ҳизбу намояндагони васоити ахбори омма ширкат варзиданд.
Рӯзномаи кори ҷаласа аз чор масъала - ҳисоботи раиси Кумитаи иҷроияи ҲХДТ дар шаҳри Хуҷанд Маликисломӣ Наим Мунаввар оид ба натиҷаҳои иҷроиши самтҳои асосии фаъолияти кории Кумитаи иҷроияи Ҳизби Халқии Демократии Тоҷикистон дар шаҳри Хуҷанд барои соли 2017, ҷамъбасти натиҷаҳои обуна ба нашрияҳои ҳизбии «Минбари халқ» ва «Сухани халқ», тасдиқи нақшаи корӣ барои нимсолаи якум ва масъалаҳои ҷорӣ иборат буд.
Маликисломӣ Наим Мунаввар зимни ҳисобот тамоми паҳлӯҳои ҳаёти ҳизбиро ба риштаи таҳлил кашида аз ҷумла таъкид дошт, ки Кумитаи иҷроияи Ҳизби Халқии Демократии Тоҷикистон дар шаҳри Хуҷанд дар такя ба Барномаи Ҳизби Халқии Демократии Тоҷикистон бобати дар амал татбиқ намудани Қарорҳои Анҷумани XII-уми ҲХДТ ва вазифагузориҳои Раиси ҳизб, муҳтарам Эмомалӣ Раҳмон дар Маҷлиси Кумитаи иҷроияи Марказӣ аз 5 январи соли 2017 ва қарорҳои конференсияҳои Кумитаи иҷроияи вилоятию шаҳрии ҲХДТ фаъолияташро пеш мебарад. Кумиҷроия ба қабули сифатноки аъзои нав диққати ҳамаҷониба дода, сафи аъзои ҳизбро аз ҳисоби кормандони ташкилоту муассисаҳо, олимону устодон, хусусан занону ҷавонони лаёқатманд ва дониши баланди мафкуравидошта зиёд намуд. Шумораи аъзоён дар шаҳр дар соли 2017 ба 16 ҳазору се саду ҳафтоду чор нафар расид, ки ин нисбат ба соли гузшта 1121 нафар зиёд буда, аз ин шумора 10230 нафарро занон ва 8713 нафарро ҷавонон ташкил медиҳанд. Пешрафти ташкилотҳои ҳизбӣ аз фаъолияти кумитаҳои иҷроияи ибтидоӣ ва ташкилотҳои ибтидоӣ вобастагии калон дорад. Бо назардошти муҳимияти ин масъала соли 2017 дар шаҳри Хуҷанд 1 адад кумитаи иҷроияи ибтидоӣ, 14 адад ташкилотҳои ибтидоӣ зиёд карда шуд. Айни замон дар назди кумиҷроия 5 адад кумитаи иҷроияи ибтидоӣ ва 217 адад ташкилотҳои ибтидоӣ фаъолият мебаранд.
Ҷиҳати ба расмиятдарории фаъолияти дохилиҳизбӣ аз ҳисоби кормандони кумиҷроия ба ҳамаи ташкилотҳои ибтидоӣ сарпарастон вобаста карда шуданд, ки мунтазам фаъолияти кории ташкилотҳои ибтидоиро зери назорати худ қарор дода, бо масъулини ташкилотҳои ибтидоӣ оид ба пешрафти кори ҳизб корбарӣ менамоянд.
Маҳз масъулиятпешагии роҳбарони ташкилоти ибтидоӣ, дилгармӣ ба кори худ боис шуд, ки дар қатори 4 кумитаҳои иҷроияи ибтидоии фаъолияташон намунавӣ дар як соли охир сафи ташкилотҳои ибтидоии корашонро хуб ба роҳ монда зиёд шуд. Махсусан зикри кумиҷроияи ибтидоии “Истиқлол” ташкилотҳои ибтидоии “Андоз пояи давлат” “Раҳим Ҷалил”, “Хуҷандобуканал”, кумитаи маҳаллаи 1-май, Беморхонаи вилоятӣ, Маркази саломатии №1, Иттифоқи матлубот, бозори “Афросиёб”, “Одилҷон Назаров”, “Мадад” ва “Хонаи пиронсолон” боиси ифтихор ва сарбаландии мост.
Музокирачиён Мавҷуда Ҳакимова, раиси ташкилоти ибтидоии «Масҷиди Савр», Хуршед Саидов, ҷонишини раиси ташкилоти ибтидоии Раёсати ҳифзи муҳити зисти вилоят, Мӯҳсинзода Фариддун, чониши раиси ташклоти ибтидоии Раҳим Ҷалил ва Матлуба Мирзоҳошимова, раиси ташкилоти ибтидоии Маркази саломатии №2 зимни баромади хеш аз фаъолияти ташкилотҳои ибтидоии худ давоми як сол гузориш дода, қайд намуданд, ки маҳз ҳамкориву дастгирии кумиҷроияи шаҳрии ҳизб буд, ки масъулияти ҳизбии аъзоён боло рафта, онҳо мунтазам дар чорабиниҳои таъсисдодаи кумиҷроияи шаҳрӣ ширкати фаъолона доштанд. Аз ҷумла, Мавҷуда Ҳакимова зимни музокира аз чорабинии муштараки ташкилоти ибтидоии «Масҷиди Савр» бо кумиҷроияи шаҳрӣ дар мавриди таҷлили Рӯзи парчам дар маҳалла ёдовар шуда, гуфт, ки чорабинии «Иди кӯча» воқеан ҳам шумораи зиёди сокинонро ба ин чорабинӣ ҷалб кард ва аксаран баъди баргузории ин ҷашни оммавӣ ба кумиҷроияи шаҳрӣ изҳори сипос намуданд.
Набиҷон Халилзода дар баромади хеш дар маҷмӯъ фаъолияти кумиҷроияро хуб арзёбӣ намуда, дар самти ташвиқу тарғиб ва инъикоси васеи дастоврдҳои ҳизбӣ тавассути васоити ахбори омма дастури мушаххас дод.
Раъно Ҳошимзода аз ҳамкории мутақобилаи Мақомоти иҷроияи ҳокимияти давлатии шаҳри Хуҷанд бо кумиҷроияи шаҳрӣ ёдовар шуда, афзуд, ки мо ҳамеша дар баргузории чорабиниҳои мухталиф такя ба аъзоёни фаъоли ҳизб мекунем. Зеро ҳадафу маром ва Барномаи ҳизб бо нақшаҳои стратегии давлат тавъаманд аст.
Муҳаббат Ӯрунбоева зимни таҳлили натиҷаҳои обуна ба нашрияҳои ҳизбӣ аз масъулиятпешагии ҳамаи кумитаҳои иҷроияи ибтидоӣ ва ташкилотҳои ибтидоӣ ёдовар шуда, таъкид дошт, ки кумиҷроия яке аз аввалинҳо шуда нақшаи обуна ба нашрияҳои ҳизбиро таъмин намуд. Дар маҷмуъ ҳизбиёни шаҳр ба 2215 нусха “Минбари халқ” ва 1350 ба «Сухани халқ» нусха обуна шуданд.
Дар идомаи ҷаласа ҳозирин нақшаи корииро барои нимсола тасдиқ намуданд.
Маликисломӣ Наим Мунаввар зимни вазифагузориҳо аз раисони кумитаҳои иҷроияи ибтидоӣ ва ташкилотҳои ибтидоӣ тақозо кард, ки дар самти сифатнок аъзо намудан, мунтазам баргузории ҷаласаҳо, хонишҳои сиёсӣ, низоми ҳуҷҷатгузорӣ, фаъол будан дар чорабиниҳои шаҳрӣ масъулият зоҳир намуда, ҳамчунин саҳми худро дар соли Рушди сайёҳӣ ва ҳунарҳои мардумӣ бо баргузории ҳамоишу конфронсҳо гузоранд.
Дар фарҷоми ҷаласа ба чанде аз фаъолони ҳизб Сипоснома ва Ифтихорномаҳо тақдим гардида, ҳамзамон дар вазъияти тантанавӣ ба аъзоёни нави ҳизбӣ шаҳодатномаи аъзогӣ супорида шуд.
Бо ҳамин ҷаласаи ҷамъбастӣ анҷом ёфт.
